Sara Duterte Accuses Impeachment Prosecution of Inventing Evidence

Gisaway ni Vice President Sara Duterte ang House prosecution panel, nga giakusahan niya og pag-imbento og ebidensiya ug miingon nga nagkahuyang na ang kaso batok kaniya atol sa impeachment trial.

“Bumabagsak na yung kaso nila kaya binibilisan, kasi wala na silang masabi. Nag-iimbento ka ng ebidensya,” matod ni Duterte sa mga reporter niadtong Lunes, Oktubre 12.

Gikuwestiyon usab ni Duterte ang impeachment complaint, nga matod niya walay mga annex o gilakip nga ebidensiya sukad sa sinugdanan.

Sa laing bahin, gipresentar sa House prosecution ang mga dokumento nga ilang gigamit aron suportahan ang mga alegasyon batok sa Bise Presidente, lakip ang bank records, Anti-Money Laundering Council (AMLC) reports, Bureau of Internal Revenue (BIR) records, ug Securities and Exchange Commission (SEC) filings.

Niadtong Oktubre 9, gitapos sa prosecution ang presentasyon sa ilang mga ebidensiya, lakip ang findings sa forensic financial analyst nga nagbanabana og ₱817.87 milyon nga giingong undeclared assets ug income nga nalambigit kang Duterte ug sa iyang bana nga si Atty. Manases “Mans” Carpio gikan 2022 hangtod 2025.

Ang Senate impeachment court maoy motimbang sa mga ebidensiya ug motino kung napamatud-an ba ang mga alegasyon batok sa Bise Presidente.